Te Wairua Pai

Pai mutunga

Mea nei tētahi kīwaha ka māringi mai i te māngai o te tangata hei whakaatu I te tino pai rawa ati o tētahi mea. Mea nei anō ētahi tauira.

Matiu: Pehana koe?

Rere:   Pai mutunga

-----------------------------------------

Matiu: I oti pehea te hui?

Rere:   Pai mutunga, e mara

Kei raro iho nei ētahi atu tauira rerenga kōrero hei whakaatu me pēhea te whakamahi i tēnei kīwaha.

• Te pai mutunga o Te One Roa a Tohe, hei wāhi kohikohi tuatua.
• Te pai mutnga o te whare hāpori o Te Ahu, hei wāhi huihuinga tāngata.

Nanakia

He whakamihi anō hoki tēnei i te pai o tētahi tangata, o tētahi mahi, o tētahi āhuatanga raini. Mea nei anō ētahi tauira rerenga kōrero hei whakatauira atu me pēhea te whakamahi i tēnei kīwaha.

• Te nanakia hoki o Paora ki te aru poaka
• Anō tō Nanakia ki te whakamahi i te rorohiko

Mārika

He kupu tēnei ka oti te whakauru atu ki te kōrero hei whakakaha ake i te whakaaro, tae atu ki ngā whakaaro pai mō te tangata, mō te aha noa iho rānei.

Whakauruhia tēnei kupu ki muri i te kupuāhua.

Rere:   Pehana koe?

Matiu: Pai mārika

----------------------------------------

Rere:   I pehea tā rātou mahi i te tāpapa kumara?

Matiu: Te pāi mārikia o tā rātou mahi, e mara

---------------------------------------

Rere:   Ko mahara au e haere ana koe ki te toa.

Matiu: Kua tae kē au

Rere:   Horo mārika koe, e mara

• Te kakama mārika o te nanakia nei

Mārire

Pērā hoki i te ‘mārika’, ka whakamahia ai tēnei kupu hei whakakaha ake i te rere o te kōrero.  Ahakoa kōrero whakamihi i te tangata, i tētahi atu mea ranei. Whakauruhia tēnei kupu ki muri i te kupu mahi.

Mea nei ētahi tauira mō te whakamahi I te kupu mārire.

• Te pai mārire o tana whakaaturanga toi māori
• Te reka mārire o ngā arani nei.
• Te ātaahua mārire o ngā whenua o Te Hiku o Te Ika.

Kei reira anō ētahi atu āhua whakamahi i te ‘mārire’, hei whakangāwari i te rere o te kōrero. Kei raro iho nei tētahi tauira.

• Inoi mārire atu ki te kuia, mana pea e whakaae mai ki a koe.